সহরায় পরব
অপর্ণা মুর্মু (ওন্দা, বাঁকুড়া)
মাড়ুরেনা কাশিবাহা
দাঁসায় বঙ্গা পলমএনা
ঞেল ঞেলতে,
হায়াম হায়াম রাবাং সাওতে
সহরায় চাঁন্দোয় বলয়েনা
সাওয়াই আগুআতে।
হাতি লেকান সহরায় পরব
সহর সেটেরেনা সাওতে
সানাম হড়াঃ মনে জিওয়ী
আন্দোড়েনা রৗস্কৗ রাসাতে।
বছর দিনরে সারি সহরায়
সহরায় চাঁন্দো কুনামি রে,
দেশখনাঃ দিশমখনাঃ বয়হা
মিশরা মেনাঃ কওয়া তাঙ্গীরে।
বৗদ হুড়ু বিলিআকান
সনের সাজতে সাজাও
রাকাব আকান বৗদ-বৗয়হৗড়,
চাষী মনেরে রৗস্কৗই সাড়েড়
যাহা সেদগেয় কয়গ অন্তেগে
ঞেল হৗলি-হৗড়য়ৗড়।
অড়াঃদুয়ৗর,ভিত,কুলহীপিন্ডৗ
নানা-হুনৗর বাহারতেক সাজাও,
সেতাঃখনাঃ তিকিন তারাসিঞ্
ছুঁটাও কানাক পোঁড-পোঁতাও
জেরেড় আকালকাঁদাল।
তুমদাঃ সাডে টামাক সাডে
মড়েসিঞ্,মড়েঞিদা
আতো টলা দিশমগটা
দুল দুলৗঃকান,
কুলহী তালা আটাল আটাল,
গাদেল সানাম হড় রৗস্কৗতেক
এনেজ-সেরেঞ্ জংকান।
দেশ দিশমখন দে- ভাগিন
ক হেজ সেটেরআকান,
বছর দিনরে সারি সহরায়
রেক ঞাপাম আকান।
মড়েসিঞ্, মড়েঞিদা আঙ্গা-
আয়ুব রিহিড়- বিদিড়,
তালাকুলহি হেসাঃবুটৗ
আখড়ারেক রৗস্কৗজংকান।
গাইকাডা সুনুম সিঁদুর ক
অজঃ আকাৎক দেরেঞ্ রে,
রাইমনি হোঁড়োগেলে মড় গালাংকাতে
মালা আকাৎক বহঃরে।
চুমহৗড়ক নাওয়াহাটাঃ রে
দিয়ৗ- বাতি জোলকাতে,
যতেবারাহিতে তলকাতে
গাপাদক খুন্টৗও ক গডারে।
কুলহি গটা ঝমর ঝমর
ঝতকয়াঃ মনে রে
ভিজৗও আকান রৗস্কৗ,
বছর দিনরে সহর সেটেরকানায়
লদব লদব হাতিলেকান
সারি সহরায় পরব।।
